အင်ဒိုနီးရှားနိုင်ငံ၊ ဘိုဂေါမြို့ရှိ တမန်စာရီ ဖားအောက်တောရရိပ်သာနှင့် မြန်မာနိုင်ငံ၊ ထားဝယ်ဖားအောက်တောရကျောင်းတိုက်တို့၏ ပဓာနနာယကကျောင်းထိုင်ဆရာတော်
ဆရာတော် အရှင်ကုဏ္ဍဓာန မဟာထေရ်မြတ်အား ၁၉၆၉ ခုနှစ်၊ စက်တင်ဘာလ (၈) ရက်နေ့တွင် ထားဝယ်မြို့၊ ခုံဝင်းဒပ်ရပ်၌ မီးရှူးသန့်စင် ဖွားမြင်တော်မူခဲ့သည်။ ခမည်းတော် ဦးကျင်စွမ် (၁၉၃၈-၂၀၁၈) ၊ မယ်တော် ဒေါ်စန်းရီ (၁၉၃၆-၂၀၀၂) တို့၏ သားငါးယောက်အနက် စတုတ္ထမြောက်သားရတနာဖြစ်ပြီး ငယ်နာမည်မှာ မောင်ကျော်ကျော် ဖြစ်ပါသည်။
ထားဝယ်မြို့ အမှတ် (၂) အထက်တန်းကျောင်းတွင် သူငယ်တန်းမှ ဆယ်တန်းအထိ ပညာသင်ကြားခဲ့ရာ အတန်းတိုင်းတွင် ပထမမှ တတိယအတွင်း ရမြဲဖြစ်ကာ ဆယ်တန်းတွင် လူရည်ချွန်ဆုကိုလည်း ရရှိခဲ့သည်။
၁၉၈၆ ခုနှစ်တွင် ရန်ကုန်စက်မှုတက္ကသိုလ် (R.I.T) သို့ တက်ရောက် ပညာသင်ကြားခဲ့ပြီး ၁၉၈၈ ခုနှစ် ကျောင်းများအပိတ်ခံရသောအခါ မိဘ၏စီးပွါးရေးလုပ်ငန်းများတွင် ဝင်ရောက်ကူညီ ဆောင်ရွက်ပေးခွင့်ရရှိခဲ့ပါသည်။
၁၉၈၈ ခုနှစ်တွင် ရေးမြို့၊ မဟာစည်ရိပ်သာတွင် အမျိုးသားယောဂီအဖြစ် ၃လကြာ စတင်တရားအားထုတ်ဖြစ်ခဲ့ရာမှ တရားအားထုတ်ရန် စိတ်ဝင်စားလာခဲ့သည်။
၁၉၈၉ ခုနှစ်တွင် ထားဝယ်မြို့ ဃောသိတာရာမဆရာတော်ဘုရားကြီးထံတွင် ညီအစ်ကိုများနှင့်အတူ မြင့်မြတ်သော ရဟန်းဘဝအား ပထမအကြိမ် ရရှိခဲ့သော်လည်း စီးပွါးရေး ပလိဗောဓများရှိသေးသဖြင့် လူပြန်ထွက်ကာ မိဘများကို ဆက်လက်ကူညီခဲ့ပါသည်။
၁၉၉၁ ခုနှစ်တွင် သံဝေဂဉာဏ်များ ပိုမိုဖြစ်လာကာ ရှင်ရဟန်း ရာသက်ပန်ဝတ်ရန် မိဘများကို ခွင့်ပန်သော်လည်း လွယ်လွယ်နှင့် မရရှိခဲ့ဘဲ သေခြင်းတရားမှာ သံဝေဂရဖွယ်ဖြစ်ကြောင်းအား ပြောပြကာ အကြိမ်ကြိမ် ခွင့်ပန်သောကြောင့်သာလျှင် မိဘများက ခွင့်ပြုခဲ့သည်။
၁၉၉၁ ခုနှစ် မေလတွင် ရေးမြို့နေ ဒါယိကာမများ အကူအညီဖြင့် မော်လမြိုင် မြို့ ဖားအောက်တောရရိပ်သာ(ပင်မ) တွင် သီတင်းသုံးတော်မူသော ဖားအောက်တောရဆရာတော်ဘုရားကြီး ခြေတော်ရင်းသို့ ရောက်ရှိခဲ့ပြီး ထိုလ (၂၃)ရက်တွင်ပင် ဆရာတော်ဘုရားကြီးကို ဥပဇ္ဈာယ်ပြုကာ မြင့်မြတ်သော ရဟန်းအဖြစ်ကို ဒုတိယအကြိမ် ရရှိခဲ့ပါသည်။
မြင့်မြတ်သော ရဟန်းအဖြစ်ရောက်ရှိပြီးနောက် ဖားအောက်တောရ(ပင်မ)တွင် (၁၈)ဝါတိုင်တိုင် ဆက်တိုက်သီတင်းသုံးတော်မူခဲ့ကာ ဖားအောက်ဆရာတော်ဘုရားကြီးနှင့် နာယကဆရာတော်များထံမှ ပရိယတ္တိ၊ ပဋိပတ္တိ များကို သင်ကြားခွင့် ရရှိခဲ့သည်။
ဖားအောက်ဆရာတော်ဘုရားကြီး၏ သာသနာပြုလုပ်ငန်းများတွင်လည်း ကူညီခွင့်ရရှိပြီး အင်္ဂလန်၊ အမေရိကန်၊ ဂျပန်၊ သီရိလင်္ကာ၊ တရုတ်၊ အင်ဒိုနီးရှား၊ မလေးရှား၊ စင်ကာပူ၊ ထိုင်းနှင့် ဗီယက်နမ်နိုင်ငံများသို့ ဖားအောက်ဆရာတော်ဘုရားကြီးနှင့်အတူ ကြွရောက် သာသနာပြုခွင့် ရရှိခဲ့ပါသည်။
(၁၉)ဝါ၌ မလေးရှားနိုင်ငံ၊ ပီနမ်ကျွန်းရှိ နိဗ္ဗိန္ဒကျောင်း ဖားအောက်ရိပ်သာတွင် သီတင်းသုံးခဲ့ပြီး (၂၀)ဝါမှ စတင်ကာ ထားဝယ်ဖားအောက်ရိပ်သာတွင် ပဓာနနာယကကျောင်းထိုင်ဆရာတော်အဖြစ် ယခုအချိန်အထိ တာဝန်ယူလျက်ရှိပါသည်။
(၂၈ )ဝါမှစ၍ အင်ဒိုနီးရှားနိုင်ငံ၊ ဘိုဂေါမြို့ရှိ တမန်စာရီ ဖားအောက်တောရရိပ်သာ၏ ပဓာနနာယကကျောင်းထိုင်ဆရာတော်အဖြစ် ထပ်မံပူးတွဲတာဝန်ယူခဲ့သည်။
နိုင်ငံတကာခရီးစဉ်များအဖြစ် အင်ဒိုနီးရှား၊ ဗီယက်နမ်၊ မကာအို၊ တရုတ်၊ မလေးရှား၊ စင်္ကာပူ၊ ကမ္ဘောဒီးယား၊ နီပေါ၊ အိန္ဒိယ၊ သီရိလင်္ကာ၊ ထိုင်ဝမ်၊ အမေရိကန်ပြည်ထောင်စု၊ ကနေဒါနှင့် ထိုင်းနိုင်ငံများသို့ ကြွရောက်ခဲ့ပြီး ဖြစ်သည်။ ၂၀၂၂ မှ ၂၀၂၅ ခုနှစ် ယခု ရဟန်းသိက္ခာ ( ၃၄ )ဝါအချိန်အထိ အင်ဒိုနီးရှားနိုင်ငံ၊ ဘိုဂေါမြို့ရှိ တမန်စာရီ ဖားအောက်တောရရိပ်သာတွင် သီတင်းသုံးနေထိုင်လျက်ရှိပါသည်။ မြန်မာ၊ အင်္ဂလိပ်ဘာသာ တို့ဖြင့် တရားနှင့် ဝိနည်းတော်များကို အွန်လိုင်းမှတစ်ဆင့်လည်း ဟောကြားပို့ချလျက်ရှိပါသည်၊ အခြားဘာသာစကားများသို့လည်းဘာသာပြန်များဖြင့် ဟောကြားပေးလျက်ရှိပါသည်။
